ILOILO CITY – Ginpasakaan na sang kaso kriminal sang Bureau of Fire Protection ang mga responsable sa pagsigabong sa Power Barge 102 nga nagresulta sang oil spill sa baybayon sang Iloilo kag Guimaras.
Sa exclusive interview sang Bombo Radyo kay Fire Senior Superintendent Atty. Jerry Candido, Regional Director sang Bureau of Fire Protection Region 6, iya ginpahayag nga tatlo ang ila ginpasakaan sang kaso sa Iloilo City Prosecutor’s Office.
Nagapangatubang sang kaso nga paglapas sa reckless imprudence resulting in damage to property sa idalom sang Article 365 sang Revised Penal Code sanday Adrian Bodiola nga welder, Rey Villarreal nga immediate supervisor, kag Jetton Villarias nga safety officer.
Wala naman sang taga AC Energy Philippines nga tag-iya sang Power Barge 102 ang ginpasakaan sang kaso bangud ang Bulacan Power amo ang nagadumala sa operasyon kag maintenance.
Nahibaluan nga ang AC Energy amo ang parent company sang Bulacan Power.
