Madugay na nga target sang Philippine Army ang duha ka babayi nga suicide bombers nga responsable sa twin bombing incident sa Jolo, Sulu.
Suno kay Philippine Army chief Lt. Gen. Cirilito Sobejana, ang duha ka babayi amo man kuntani ang tuyo dakpon nanday Major Marvin Indammog kag sang iya intelligence team sang tinalikdan nga Hunyo 29.
Apang kun matandaan, ginluthang-patay sang kapulisan sa Jolo ang grupo ni Indammog sang nag-agi ang mga ini sa police checkpoint.
Suno kay Sobejana, bangud sa natabo, nakalusot ang duha ka babayi sa monitoring sang Philippine Army, rason nga nakahimo pa ang mga ini sang krimen nga nagresulta sa kamatayon sang 14 ka tawo kag 75 ang pilason sa Plaza Rizal sa Jolo.
May kaangtanan diri, nagapati man ang pinuno sang Philippine Army nga dapat ipatuman ang martial law sa Sulu matapos ang natabo nga pagsigabong agud mangin ‘behaved’ na ang mga tawo.
Ini nga suhestyon ang ginpaboran man ni Philippine National Police chief Gen. Archie Gamboa.
Apang suno kay Sulu Governor Abdusakur Tan, may yara na sang anti-terrorism law kag indi na kinahanglan sang ila probinsya sang martial law.
