Naglab-ot sa 3,700 ka mga tawo sa Sweden ang na-‘Wow Mali’ matapos una nga ginpahayag nga nagpositibo sa COVID-19 apang sang ulihi natukiban nga may sala sa ginagamit nga testing kit.
Suno sa Public Health Agency, gingamit sang Sweden ang testing kits sang BGI Genomics nga halin sa China apang indi ini makasarang magpaanggid kun tuman lang kanubo ang level sang virus ukon negatibo ang resulta.
Suno kay Karin Tegmark Wisell, pinuno sang microbiology department sang amo nga ahensya, madamo na nga mga pungsod ang naggamit sang amo nga test kits.
Ang BGI Genomics ang nakabaton sang emergency use authorization halin sa US authorities para sa coronavirus testing kits sang Marso kag nakabaton man sang Emergency Use Listing halin sa World Health Organization sang Mayo.
Sa subong, gin-adjust sang mga laboratory sa Sweden ang ila methodology sa pag-test sang COVID-19.
Indi man matumod kun pila ka tawo ang na-test gamit ang nasambit nga testing kits sang China.
