Nagbalik na sa training ang Philippine Basketball Association (PBA) teams matapos ang kapin anum ka bulan nga pahuway sang liga bangud sang COVID-19 pandemic.
Suno kay PBA commissioner Willie Marcial, una gid nga nag-umpisa ang Barangay Ginebra sang ila paghanas kahapon nga adlaw kag ginalauman nga adlaw-adlaw na ini nga matabo.
Matandaan nga gin-untat ang practice sang mga team sang tinalikdan nga Marso; kag sang Hulyo, nakabaton sang go-signal ang PBA gikan sa gobyerno nga mahimo na i-resume ang small-group training sessions.
Apisar sini, may delay man sa gihapon nga natabo bangud ginpaidalom sa modified enhanced community quarantine ang Metro Manila kag ang kaiping nga mga probinsya.
Subong nga nakabalik na sa gym ang mga players, nagpasalig si Marcial nga sundon sang mga team ang istrikto nga health and safety protocols kag may yara man sang igapasa nga daily report agud mahibaluan kun sa diin sila nagapadulong kag kun sin-o ang ila naka-close contact.
May yara man sang patigayunon nga surprise inspections ang Office of the Commissioner agud masigurado nga wala sang may nagalapas sa protocol.
