ILOILO CITY – Nagalaum ang pamilya ni Iloilo City Vice Mayor Jeffrey Ganzon nga makagwa na sa ospital ang bise-alkalde antes sang iya kaadlawan sa Lunes, Agusto 31.
Sa interview sang Bombo Radyo kay Iloilo City Councilor Rudolph Ganzon, iya ginpahayag nga yara na sa maayo nga kondisyon ang iya amay kag sa pagkamatuod, masinadyahon kag excited na ini kaina sang aga.
Matandaan nga kahapon, Agusto 28, gin-anunsyar ni Iloilo City Mayor Jerry Treñas nga gindala sa ospital si Vice Mayor Ganzon matapos nagpalanuka kag nahilanat.
Una nga ginpahayag nga may yara sang acute onset pneumonia si Vice Mayor Ganzon gani ginpaidalom sa swab test bangud nakitaan sang bacterial infection ang iya laboratory results.
Suno kay Councilor Ganzon, posible nga natrigger sang stress kag daan na nga kodsisyon sa gall bladder ang iya amay gani nga ginhilanat.
Nagnegatibo sa rapid test para sa coronavirus disease 2019 (COVID-19) ang bise alkalde apang ginahulat pa subong ang resulta sang reverse transcription polymerase chain reaction (RT-PCR) test.
Bilang pagsunod sa protocol kag advise ni Mayor Trenas, ginpaidalom man sa strict quarantine ang pamilya ni Vice Mayor Ganzon.
