ILOILO – Magapatigayon sang bacteriological testing ang local government unit (LGU) sang Pavia sa tubig nga gina-supply sang BP Waterworks, Inc. nga amo ang ginareklamo sang mga residente sang Deca Homes Subdivision sa Pavia, Iloilo.
Sa interview sang Bombo Radyo kay Anna Dajay, presidente sang homeowners association sa Phase 1 tubtob 3 sang nasambit nga subdivision, iya ginpahayag nga iga-conduct ang test sa tubig bwas sa aga, Setyembre 1.
Matuod suno kay Dajay nga madugay na ang huol nga tuga sang tubig sa ila lugar kag indi na masarangan ang dala sini nga baho kag malain nga duag sa iban nga balay.
Magluwas diri, tuman man kahinay ang water pressure sa iban nga balay kag mismo ang natungdan ang makapamatuod sa testimoniya sang iban nga mga pumuluyo nga may ginatubuan sang arikis kag nagamasakit bangud sang tubig.
Suno kay Dajay, duha ka beses na nga ginconduct ang bacteriological water testing sa amo nga lugar kag ginsumite sa Department of Science and Technology (DOST) kag sa pribado nga laboratoryo apang negatibo ang resulta.
Nagpahayag man sang pagkadismaya si Dajay bangud wala gid nakaagi nga nagtambong ang tiglawas sang BP Waterworks, Inc. sa mga general assembly sang subdivision agud ma-address ang problema sang mga pumuluyo.
Labi pa gid nga ginadugangan sang mga residente ang ila testimoniya nga mabaho, mahigko, kag indi mainom ang tubig nga ginasupply sang BP Waterworks, Inc.
Sa interview sang Bombo Radyo sa isa ka residente nga nagpahinago lang sa pangalan, iya ginpahayag nga tatlo ka ka tuig na siya nga nagapuyo sa amo nga lugar kag makapamatuod siya nga ang iya kabataan ang naigu man bangud sang malain nga suplay sang tubig.
Suno sa amo nga residente, natubuan sang rashes sa lawas ang iya isa ka tuig nga anak.
Nagabaligya man sang pagkaon iya pamilya gani suno sa natungdan, kinahanglan pa nila ang dugang nga budget agud magbakal sang mineral water agud gamiton sa paghugas sang utensils kag iban pa.
Nagalaum ang natungdan nga subong nga may pandemya, i-address man sang water services provider ang ila problema bangud kinamatarong nila ini bangud nagabayad man sila sang insakto. #
