ILOILO CITY – 16 ka kabarangayan sa syudad sang Iloilo ang nagapabilin nga COVID-19 free.
Suno sa record sang Iloilo City Health Office, as of August 23, wala pa sang kaso sang COVID-19 ang mga masunod:
Sa Iloilo City Proper:
Barangay Bagumbayan, Barangay Jalandoni Wilson, Barangay Gloria, Barangay Inday, Barangay San Felix, Barangay Malipayon, Barangay Ma. Clara, Barangay Flores, Barangay Rima Rizal
Sa distrito sang Lapaz:
Barangay Luna, Barangay Bantud, Barangay Aguinaldo, Barangay Lopez Jaena Norte, kag Barangay Laguda
Sa distrito sang Mandurriao:
Barangay San Rafael kag Barangay Sta. Rosa
Sa interview sang Bombo Radyo kay Punong Barangay Rod Sarmiento sang Barangay Inday, Iloilo City Proper, iya ginpahayag nga istrikto ang mga pagsulundan sa ila lugar kun sa diin wala ginapahanugutan ang mga pangayaw nga magsulod kun wala sang importante nga transaksyon.
Suno kay Sarmiento, gin-abisuhan na niya ang mga tag-iya sang boardinghouse nga i-monitor kun sin-o ang nagabisita sa ila nga boarders bangud wala sila nakasigurado kun diin ini halin nga barangay.
Bisan ang nagapanukot sang utang suno sa natungdan ang nagaagi gid sa ila logbook entry.
Suno pa sa punong barangay, kun mag-abot ang 8:00 sa gab-i, wala na sang may naga-gwa sa ila mga balay.
