Suportado ni Japanese tennis star Naomi Osaka ang mga tawo nga nagapakigbato batok sa social injustice.
Sa pag-umpisa sang hampang sa US Open sa New York, nagsuksok ang tennis star sang face mask nga may ngalan nga Breonna Taylor, ang African American nga ginluthang sang mga kapulisan tubtob napatay sang Mayo subong nga tuig sa Louisville, Kentucky.
Nahibaluan nga madamo nga atleta sa kalibutan ang nagapromote sang Black Lives Matter (BLM) movement.
May kaangtanan diri, ginpahayag sang highest-paid female athlete nga nakahibalo siya nga madamo nga tawo ang nagalantaw sa tennis, gani ginagamit niya ini nga paagi agud mapakilala ang social justice kag mapahibalo ang istorya ni Taylor.
Suno pa kay Osaka, may pito pa siya ka face masks apang gin-una niya sa pagsuksok ang may ngalan ni Taylor bangud siya ang pinakaimportante subong nga labi nga kontrobersyal ang racism kag police shootings sa Estados Unidos.
