Indi malaragway ang kalipay ni Ed Sheeran sang gin-anunsyar nga ginbun-ag na sang iya asawa nga si Cherry Seaborn ang ila labing una nga bata nga babayi.
Suno sa 29 anyos nga British pop superstar, sa cloud nine ang iya nabatyagan bangud sa iya baby girl nga ginhingadlan kay Lyra Antarctica Seaborn Sheeran.
Nahibaluan nga binulan na nga wala nagpakita sa social media si Ed apang nagbalik lang ini sa Instagram agud ipakita ang “amazing delivery team” nga nagbulig sa pagbun-ag sang iya asawa sang nagligad nga semana.
Beautiful and healthy si Lyra suno kay Ed kag sa subong, nagahingyo siya sang privacy apang nagpasalig man sa iya mga fans nga magabalik siya kun tion na.
Sa subong madamo ang espekulasyon sang mga fans kag lakip diri amo ang nagapahayag nga si Lyra ang main character sang popular fantasy trilogy nga His Dark Materials sang English Novelist nga si Sir Philip Pullman kag posible amo ang nag-inspire kay Sheeran nga isa man ka fan sang nasambit nga author.
