Kumpirmado nga duha ka Pinoy ang napatay sa nagluntad nga gas explosion sa restaurant sa Sheikh Rashid Bin Seed Road ukon Airport Road sa Abu Dhabi sa United Arab Emirates.
Suno sa ginpagwa nga official statement sang Department of Foreign Affairs, nakapakig-angot na si Ambassador Hjayceelyn M. Quintana sa pamilya sang napatay nga mga Pinoy agud maghatag sang simpatiya kag agud magpat-od nga mahatag ang nagakaigu nga bulig.
Padayon pa subong nga ginatipon sang embahada ang mga impormasyon may kaangtanan sa iban pa nga mga napilasan nga mga Pinoy bangud sang insidente nga natabo sang Lunes, Agusto 31.
Matandaan nga una na nga ginpahayag sang mga otoridad sa United Arab Emirates nga isa sa mga biktima ang malapit sa explosion site sa Rashid Bin Saeed Street sang natabo ang paglupok samtang ang isa pa ang nagatabok lang sa dalan sang na-igu ini sang debris.
