Kumpiyansa ang Malacañang nga mapadayon sang bag-o nga pinuno sang Philippine National Police (PNP) ang mga hinimuan sang mga mataas nga opisyal sang police organization nga ginasaligan sang publiko.
Ang bag-o nga PNP chief amo si Police Lt. Gen. Camilo Cascolan nga sa subong amo ang nagauyat sang second-highest position sa police force.
Buslan niya sa pwesto si Police Gen. Archie Gamboa nga maga-retire subong nga adlaw, Setyembre 2.
Una na nga ginpahayag ni Department of the Interior and Local Government (DILG) Secretary Eduardo Año nga ginpili ni Presidente Rodrigo Duterte si Cascolan bangud sang seniority.
“Ang gusto kasi talaga ng Presidente ay sinusunod ang seniority and Gen. Cascolan is qualified so we welcomed the decision of the President,” suno kay Año.
Suno kay Año, apisar duha lang ka bulan ang itinir ni Cascolan sa pwesto bangud natalana ini nga mag-retire sa Nobyembre 10, malawig pa ini nga tiempo agud makahimo sang madamo nga accomplishment ilabi na subong nga may coronavirus disease 2019 (COVID-19) pandemic.
Si Cascolan ang miyembro sang Philippine Military Academy “Sinagtala” Class of 1986 kag lakip sa iya “mistahs” ukon classmates amo ang iya mga ginsundan nga sanday former police chiefs Gamboa, Oscar Albayalde kag Sen. Ronald Dela Rosa.
Si Cascola ang pinakilala bilang isa sa co-authors sang Oplan Double Barrel, ang basis sang anti-drug campaign ni Presidente Duterte.
