Nagpasalig si Department of Health (DOH) Secretary Francisco Duque III nga tinluan niya ang iya pangalan gikan sa ginapahayag nga kahilabtanan niya sa multibillion-peso corruption scandal sa Philippine Health Insurance Corp. (PhilHealth).
Suno kay Duque, magakooperar siya sa anuman nga imbestigasyon nga patigayunon may kaangtanan sa tanan nga ginaalegar nga anomaliya sa PhilHealth.
“As I have previously stated, I will cooperate with any inquiry on the matter by the concerned government agencies. Certainly, I intend to clear my name,” pahayag ni Duque.
Una diri, nagrekomenda ang Senate Committee of the Whole nga pasakaan sang kaso nga malversation and graft si Duque, si anay PhilHealth Chief Ricardo Morales, kag iban pa nga mga opisyal bangud sang “improper and illegal implementation” sang interim reimbursement mechanism (IRM).
Suno sa senado, ang ginhimo ni Duque bilang isa ka ex-officio member sang board of directors sang PhilHealth ang nagpahanugot sa ahensya nga makahatag sang advance payments sa mga ospital nga nagaakomodar sang COVID-19 patients.
Depensa naman ni Duque, ‘unfortunate’ ang sitwasyon nga nadalahig siya sa mga iregularidad sa disbursement sang dalagku nga bayad sa ospital bangud sa pagkamatuod, wala gani siya sa deliberation kag wala man siya nakapirma sa Board Resolution.
“As a non-voting Chairman under the Universal Health Care Law, it is unfortunate that I was impleaded in the alleged IRM (interim reimbursement mechanism) irregularities when I was not even present during the deliberation nor did I sign the Board Resolution.”
Sa imbestigasyon sang Senado, nadiskubrehan nga magluwas sa advance payments sa mga ospital nga may COVID-19 patients, gingamit man ang P231.15 million sa dialysis centers kag maternity clinics nga wala man nagabaton sang pasyente nga may COVID-19.
Magluwas sa imbestigasyon sa Senado, nagapangatubang man ang health chief sang imbestigasyon sang Office of the Ombudsman may kaangtanan sa COVID-19 response sang DOH.
