ILOILO CITY – Madasig ang pagrecover ni Iloilo City Vice Mayor Jeffrey Ganzon sa coronavirus disease 2019 (COVID-19).
Sa interview sang Bombo Radyo kay Rara Ganzon, anak sang bise alkalde, iya ginpahayag nga aktibo, mapagsik, kag nagadali na nga makapauli ang ila amay nga subong naka-admit pa sa ospital.
Ginatapos na lang subong ang medication suno kay Ganzon kag nagalaum sila nga maka-gwa na sa ospital antes matapos ang semana.
Sang nagligad nga Lunes, Agusto 31, ginselebrar ni Vice Mayor Ganzon ang iya kaadlawan sa ospital.
Suno kay Ganzon, ginabasa nila sa ila amay ang mga komento sa social media nga halin sa mga tawo nga nagabulig pangamuyo para sa iya recovery.
Nahibaluan nga gin-anunsyar nga nagpositibo sa nasambit nga respiratory illness ang bise alkalde sang Domingo, Agusto 30.
Napaidalom naman sa swab test ang iban nga close contact ni Vice Mayor Ganzon nga ginalakipan sang iya pamilya.
