ILOILO CITY – Wala pa sang operational guidelines nga ginpapanaug ang National Inter-Agency Task Force may kaangtanan sa bag-o nga pagsulundan sa quarantine sang mga returning overseas Filipinos (ROFs).
Sa bag-o nga pagsulundan, kinahanglan lang nga magpresentar sang negative reverse transcription polymerase chain reaction (RT-PCR) test results ang ROFs halin sa ila point of origin, kag indi na kinahanglan nga i-reswab kag ipaidalom sa 14-day mandatory quarantine pag-abot sa ila tagsa ka banwa ukon siyudad.
Sa interview sang Bombo Radyo kay Rizza Joy Moldes, OIC-Director sang Overseas Workers Welfare Administration (OWWA) Region VI, iya ginpahayag nga mangin in-charge sa gihapon ang OWWA sa repatriation sang mga ROFs kag magahatag sa gihapon sila sang mga pagkaon.
Apang suno kay Moldes, ang local government unit na ang may responsibilidad sa tranportation sang mga ROFs padulong sa ila tagsa ka balay sa ila banwa.
Ginpahayag ni Moldes nga sa subong, ginahulat pa ang memorandum sang national kag regional IATF agud mahibaluan sang tagsa ka ahensya sang gobyerno kag sang local government unit ang ila responsibilidad.
Samtang wala pa ang implementing guidelines, magapabilin anay ang quarantine kag protocol sa pagpaidalom sa swab test sa mga repatriates.
