ILOILO – Pahanagutan na nga makabalik sa simbahan umpisa sa Domingo, Setyembre 6, ang mga sumilimba sa syudad sang Iloilo apang limitado lang sa 50 percent seating capacity.
Sa interview sang Bombo Radyo kay Father Angelo Colada, director sang Archdiocese of Jaro Commission on Social Communications, iya ginpahayag nga ini nga pagbag-o sa mass attendance ang kasunod sang pagbalik sa syudad sa modified general community quarantine (MGCQ).
Sa bahin sang probinsya sang Iloilo, ginahulat pa ni Father Colada ang pamat-od ni Iloilo Governor Arthur Defensor Jr. kun pahanugutan ang 50 percent capacity bangud santo sa ginpapanaug nga executive order sang nagligad nga semana, limitado lang sa 30 percent ang makakadto sa mga simbahan sa probinsya.
Suno pa kay Colada, wala pa subong sang bag-o nga guidelines kun required ang face shield sa mga magapadulong sa simbahan apang kun may ara sang mandu nga mandatory ini, handa man ang simbahan sa pagsunod sa protocol.
BULIG SA MENTAL HEALTH
Sa pahayag naman sang Inter-Agency Task Force for the Management of Emerging Infectious Diseases (IATF) nga kinahanglanon ang bulig sang simbahan agud makahatag sang counseling and guidance na nagasuprer sang depression subong nga may COVID-19 pandemic, ginpahayag ni Colada nga isa ang mental health sa ginatutukan sang Archdiocese of Jaro.
Suno kay Colada, ang Commission on Health sang archdiocese ang nagatukod na sang grupo sang mga counselors kag psychologists agud sarang mapakig-angutan sang mga tawo nga may problema sa mental health.
Ginpahayag ni Colada nga bukas ang simbahan sa mga tawo nga luyag magpangayo sang laygay sa mga pari.
