ILOILO CITY – Ginatutukan sang Iloilo City Government ang pagbantay sa mga pumuluyo sa ila pagtuman sang pagsulundan may kaangtanan sa pagbakal kag pagkonsumo sang liquor.
Sa interview sang Bombo Radyo kay Mr. Jeck Conlu, COVID-19 spokesperson sang Iloilo City Government, iya ginpahayag nga tubtob 6:00 lang sa gab-i ang baligyaanay sang makahulubog nga ilimnon.
Hugot man nga ginadumilian ang pag-inom sa pampubliko nga lugar bisan pa sa atubang lang sang tiangge kun sa diin ginbakal ang ilimnon.
Wala ini ginapabay-an suno kay Conlu bangud magluwas nga importante ang pagsunod sa minimum health standards, delikado ang pag-inom bangud maangot ini sa mga aksidente sa dalanon.
Suno kay Conlu, apisar makapoy ang trabaho kag 180 ang kabarangayan sa syudad, ginalibot sang compliance team ang bug-os nga Iloilo City agud mamonitor ang mga pumuluyo.
Ang suludlon nga mga barangay ang wala man ginapabay-an sang mga compliance officers suno sa natungdan.
Nagalaum man ang natungdan nga subong nga nakabalik na sa syudad ang mga pulis nga gin-augment para sa COVID-19 response sa Cebu, kuntani makabulig man sila sa pagpatuman sang health protocols.
Magluwas diri, suno sa opisyal, nagatuman man ang mga residente sa mga protocol umpisa sang ginpatuman ang modified general community quarantine (MGCQ) sa syudad sang Setyembre 1. #
