ILOILO – Bug-os kag hugot ang paglaum sang pamilya nga buhi pa ang 37 anyos nga seaman nga isa sa mga namissing matapos naglugdang ang Gulf Livestock 1 bangud sa Bagyo Maysak sa baybayon sang Amami Oshima island sa Japan.
Sa interview sang Bombo Radyo kay Clarissa Suñer, asawa sang seafarer nga si Mark Glenn Suñer nga tumandok sang Sta. Barbara, Iloilo, iya ginpahayag nga nakapakig-angot pa ang iya bana sa iya paagi sa Messenger chat sang nagligad nga Setyembre 1, 9:33 sa gab-i.
Santo sa mensahe nga ginpadala sa asawa, nagahingyo ang bana nga buligan sila sa pagpangamuyo bangud ginasunod sang bagyo ang barko nga ila ginasakyan.
Matapos ang mensahe, wala na sang komunikasyon si Mark Glenn sa iya pamilya.
Suno kay Clarissa, Hulyo sang nagbalik sa trabaho bilang junior electrician ang iya bana apang apat-lima ka tuig na ini nga nagatrabaho bilang isa ka seaman.
Sa subong, nagalaum ang natungdan nga mas mapadasig ang rescue operations agud makita ang iban nga namissing lakip na ang iya bana. #
