Nanari-sari ang paagi sang mga business owners agud masustiner ang ila negosyo subong nga may COVID-19 pandemic.
Didto sa isa ka sushi restaurant sa Japan, lawas ang ginakapital agud mangin daku ang income kag magbakal sa gihapon ang mga customer.
Ang 60 anyos nga restaurant sa syudad sang Anjo sa Aichi Prefecture sa Japan ang ginapanag-iyahan ni Masanori Sugiura.
Suno kay Masanori, tuman ka daku ang pierde sang iya negosyo kag halin sa 50 ka mga staff, apat na lang ang nabilin bangud wala na siya sang inugpasweldo.
Bangud sini nga mga kapierdehan, naisipan sang tag-iya nga gamiton ang iya hobby sa pag-work out sa gym agud makahimo sang paagi.
Ini ang gintawag nga Delivery Macho service kun sa diin ginagamit niya ang buff bodybuilders bilang delivery boys.
Mismo ang mga gym buddies sang tag-iya ang nagbulig sa iya sa bag-o nga Delivery Macho service kag bangud ginakilig ang mga babayi kag ginapicturan sila, nangin viral ang restaurant kag nagdamo liwat ang orders.
Sa subong, ang nasambit nga sushi restaurant ang may ara sang walo tubtob napulo ka Delivery Macho orders kada adlaw kag bangud sini, ang monthly revenue sa service ang yara na sa 1.5 million yen ukon masobra P680,000.
