ILOILO CITY – Dagdagan na sang order of sanction ang 10 ka mga resto bars sa syudad sang Iloilo nga nadakpan nga nagaoperate apisar wala sang business permit.
Sa interview sang Bombo Radyo kay Nestor Canong, pinuno sang Task Force on Morals and Values Formation, iya ginpahayag 10 sa 12 ka mga establisemento nga gin-isyuhan sang citation tickets sa distrito sang Mandurriao ang napamatud-an nga iligal nga nagaoperate kag nagaserbe pa sang makahulubog nga ilimnon.
Ang isa suno kay Canong ang may ara man sang 2020 business permit kag ulihi lang nasapar nga mapakita sa inspection team, samtang ang isa naman ka resto bar ang may menor lang nga kakulangan sa pasilidad nga dapat kay-uhon.
Suno kay Canong, wala pa subong sang final document apang ginadraft na ini kag ginahulat na lang ang mandu ni Iloilo City Mayor Jerry Treñas.
Nahibaluan nga magluwas sa kakulang sa business permit, ginlapas sang 10 ka resto bars ang Executive Order No.140 ni Iloilo City Mayor Jerry Treñas nga nagasaad nga ‘absolutely prohibited’ ang mga beerhouses kag similar establishments nga may tinutuyo nga magserbe sang makahulubog nga ilimon. #
