ILOILO – Nagpasalig ang Department of Health Region VI nga nagacoordinate sila sa Western Visayas Medical Center Sub-National Laboratory may kaangtanan sa pagpadasig sa pagpagwa sang resulta sang swab test sa Western Visayas.
Suno kay Dr. Renilyn Reyes, pinuno sang Public Health Program Development Cluster sang Department of Health Region VI, maga-isyu sila sang advisory agud mapahanumdom sa mga banwa nga gina-send na diretso sang Sub-National Laboratory ang swab test results sa mga disease reporting units.
Suno kay Reyes, dapat nga regular ang pagmonitor sa mga email address sang disease reporting units agud mahibaluan man gilayon kun may magpositibo sa COVID-19.
Ini ang kasunod sang tuman ka damo nga reklamo nga delayed ang paghatag sang resulta rason nga nagakadugayan man ang iban sa quarantine facilities.
Dugang pa, may ginpadala man nga dugang nga mga encoders sa laboratory agud makabulig sa improvement sang turn-around time.
