Maathag nga may yara sang mga discrepancy sa indi patas nga alokasyon sang pondo sang Department of Public Works and Highways (DPWH) sa idalom sang proposed 2021 budget.
Sa briefing sa House Committee on Appropriations, ginkwestyon sang mga mamalidha ang P666.47-billion budget sang ahensya kun sa diin may mga rehiyon sa pungsod nga makabaton sang mas mataas nga budget kag may mga lugar naman nga tuman ka limitado ang budget nga indi gani makasuporta sa infrastructure needs sang mga probinsya.
Sa interview sang Bombo Radyo kay Iloilo Third District Representative Lorenz ‘Nonoy’ Defensor, iya ginpahayag nga lakip sa naistoryahan amo ang concern ni Negros Oriental 3rd District Rep. Arnolfo Teves Jr. kun sa diin ginapahayag nga makabaton sang P8 billion ang Taguig City kag makabaton sang P11.8 billion ang Camarines Sur.
Suno kay Defensor, natural lang para sa mga mamalidha nga ireklamo ini nga budget bangud isa ang Visayas sa may pinakagamay nga allocated fund kun sa diin nagadangat lang ang pondo sa P87 billion kag tunga-tungaon pa sang mga probinsya.
“Nagabatyag na sila kay nabal-an nila nga ang isa ka probinsya, may P11 billion na… and yet ang P87 billion for the entire Visayas Region, tunga-tungaan pa ina sa mga distrito. Sa Iloilo mismo, may 6 ka distrito,” pahayag ni Defensor.
Suno sa mamalidha, nahangpan nila nga may mga rehiyon nga nagakinahanglan sang daku nga pondo bangud sang daku nga government project sa ila nga lugar, apang ‘it appears that there are discrepancies pag-abot sa iban nga distrito.’
“We are asking for equitable distribution lang… not equal but equitable because the distribution must be based upon the needs of each district. It does not have to be equal but the infrastructure needs must be addressed kay sa National Expenditure Program, ang hambal sang presidente, ang hambal sang DBM, must ‘reset, restart and recover’. If the distribution of the government resources is not equitable, pila lang ka mga probinsya ang makahambal nga they can actually ‘reset, restart and recover’.
Nahibaluan nga una na nagpasalig si DPWH Secretary Mark Villar nga igasumite nila ang listahan sang mga distrito nga may highest allocations bangud sa pagkamatuod, “wala sang may ginatago” ang DPWH. #
