ILOILO CITY – Ginalauman nga mabuligan sang Iloilo Market Market 2020 ang madamo nga mga tawo nga nadulaan sang trabaho bangud sang coronavirus disease 2019 (COVID-19) pandemic.
Ang nasambit nga trade fair ang patigayunon sa Setyembre 25-27, 10:00 sa aga tubtob 8:00 sa gab-i, sa isa ka mall sa distrito sang Mandurriao kag magapakita sang mga nanuhay-tuhay nga produkto sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ini nga trade fair sang small and medium-sized enterprises (SMEs) ang hiwaton samtang ginabalanse ang ekonomiya kag ang ikaayong lawas sang mga tawo.
Suno sa alkalde, mapakita sa sini nga aktibidad nga apisar may pandemya, masarangan sang syudad nga makatibawas samtang ginasunod ang mga health protocol.
Suno naman kay Philippine Chamber of Commerce Iloilo (PCCI) President Atty. Joebert Peñaflorida, matigayon ang tatlo ka adlaw nga aktibidad paagi sa pagbululigay sang Iloilo City Government, Philippine Chamber of Commerce Iloilo (PCCI), Iloilo Hotel Restaurants Resorts Association (IHRRA), Obra Ilonggo, kag iban pa nga ahensya sang gobyerno. #
