Wala sang maayo nga dulot ang diktadurya bangud nagaresulta ini sa mas madamo nga kaso sang pagpang-abuso sa mga tawo kaangay sang natabo sang ginpatuman ang Martial Law sa Pilipinas.
Ini ang pahayag ni Iloilo City Mayor Jerry Treñas sang iya ginbalikan ang iya nangin eksperyensya matapos gindeklarar ni anay President Ferdinand Marcos ang Martial Law sa pungsod sang Setyembre 21, 1972.
Sa interview sang Bombo Radyo kay Treñas, iya ginpahayag nga nakaagi man siya nga nagsunod sa isa ka peaceful protest sa Metro Manila bangud kabahin siya sang Partido Demokratiko-Sosyalista ng Pilipinas.
Suno sa alkalde, gindakop siya kag ang iya mga kaupod kag ginhunong sa isa ka detention center sa sulod sang lima ka gab-i kun sa diin aktwal siya nga nakabati sang pagpang-harrass sang iban nga mga preso nga yara sa ila tagsa ka karsel.
Apisar wala man ginkastigo baliskad sa natabo sa iban nga biktima sang batas militar, nakabatyag ang alkalde kag ang mga kaupod niya sang sang kakulba bangud nagalinupok lang ang armalite sa tungang gab-i kag tuman ka gahod .
Ginbalik-balikan man sang natungdan nga may ara sila sang isa ka kaupod nga napatay bangud sa sunod sunod man nga mga interogasyon mga wala nasarangan.
Nagalaum ang alkalde nga indi na maliwat pa ang kaangay nga rehimen kag pagpahanugot sa gahum sang diktadurya bangud madamo ang mangin biktima sang pag-abuso sa tawhanon nga kinamatarong. #
