Nagpanindugan ang Office of the Ombudsman nga indi na kinahanglan ang Statements of Assets, Liabilities and Net Worth (SALN) sang mga opisyal sang gobyerbo agud maimbestigaran ang kurapsyon.
Sa budget briefing sa Kamara, ginpahayag ni Ombudsman Samuel Martires nga base sa eksperyensya sang Ombudsman, ginagamit lang ang SALN agud gub-on ang isa ka tawo sa gobyerno ukon ang kasumpong sa pulitika.
Matandaan nga sini man nga bulan, nagpagwa sang mandu ang Ombudsman nga ginalimitahan na ang mahimo maka-access sa SALN kag mahimo lamang ini nga malantaw kun may official investigation, court order, ukon pahanugot halin mismo sa opisyal.
Suno kay Martires, kinahanglan nga tun-an liwat sang gobyerno ang form sang SALN bangud mahimo man ini nga magamit sang mga kritiko kag akig sa gobyerno agud makasuhan ang mga opisyal.
Ang form sang SALN suno sa natungdan ang halin man sa indi maayo nga layi kag indi maayo nga sistema nga dapat pa nga kay-uhon.
Gin-ako man ni Martires nga wala na nagaconduct sang lifestyle check ang Office of the Ombudsman sa mga opisyal sang gobyerno.
Suno kay Martires, madugay na niya nga ginakwestyon ang logic sini kag indi maathag nga mga probisyon.
Ginpahayag man sang natungdan nga ginhingyo niya sa Kongreso nga amyendaran ang Republic 6713 ukon Code of Conduct and Ethical Standards for Public Officials and Employees apang nadelay pa bangud sang COVID-19 pandemic.
