ILOILO CITY – Ginkumpirma sang isa ka transport group sa syudad sang Iloilo nga kapin 100 ka units sang ila nasakupan nga grupo ang magauntat sa pagbyahe umpisa subong nga adlaw, Setyembre 25.
Sa interview sang Bombo Radyo kay Rizalito Alido, presidente sang City Loop Integrated Alliance of Jeepney Owners and Drivers’ Association (CLIAJODA), iya ginpahayag nga ini nga mga units ang may ruta nga Mandurriao, Bo. Obrero, kag Baluarte.
Ang transport holiday suno sa natungdan ang patigayunon bangud sang tuman ka hugot nga protocol sa mga pampubliko nga salakyan nga magatuga sang kapierdehan sa income sang drivers.
Suno kay Alido, wala ginatuman sang Land Transportation Franchising and Regulatory Board Region (LTFRB) Region VI ang ila una gin-istoryahan nga sa Lunes, Setyembre 28, pa maga-umpisa ang pag-isyu sang warning sa mga drivers nga wala nagasunod sa ‘one-seat-apart’ nga arrangement.
Santo man sa una nga naistoryahan, Oktubre 5 pa papanaugan sang penalidad ang magalapas sa pagsulundan.
“Maayo pa ni ang nagabaligya sang ginamos, mapatihan pa. Ang iban da nga de-barong pa kun kis-a, liwat liwat ang desisyon? Ano ni?,” ang dismayado nga pahayag ni Alido.
Nakibot ang mga jeepey drivers suno sa natungdan bangud tuman pa ka daku sang multa kag wala na sila sang kitaon.
Sa idalom sang one meter nga physical distance nga arrangement, mga anum lang ka pasahero ang sarang nga mapasakay sang regular nga jeep.
Suno sa natungdan, may ginpasa man siya nga proposal sa provisional fare increase kun sa diin P15 ang plete sa traditional PUJs kag P20 sa modernized PUJs kag ini ang ginsumite sa LTFRB Region VI.
“May number man ko da kay Director (Dir. Richard Osmeña sang LTFRB VI). Kami nga mga transport leaders kompleto number namon da, wala man kami ginpahibalo. Maayo ni kun nagapamati siya kay mabal-an ya. Pila ka beses man ko da nga nagapanawag sa iya, nagasuggest kita, pero ang siling ya, ‘DO NOT TELL ME WHAT TO DO.'”
Suno kay Alido, naga-suggest sila nga transport leaders bangud sila ang direkta nga maapektuhan sang mga desisyon. “Indi man ni tudlo. Suggest lang. Galing kay mataas ang tingkoy ya ni. Daw talahaon man ni siya nga tawo. Dapat kun ano ang hinambalan ninyo, hambalan man naton di. Kay we are gentlemen enough, dapat meetingan naton ini with all the transport leaders.”
Magabalik lang ang byahe suno sa natungdan kun indi na tuman ang kapierdehan sang mga drivers. ###
