ILOILO CITY – Nagdangat na sa 54 ang coronavirus disease 2019 (COVID-19) cases sa Iloilo City Hall.
Sa interview sang Bombo Radyo kay Jeck Conlu, COVID-19 spokesperson sang Iloilo City Government, iya ginpahayag nga asymptomatic ang kalabanan nga mga pasyente ukon wala sang sintomas sang nasambit nga balatian.
May isa ukon duha lang nga nakabatyag sang mild symptoms suno sa natungdan.
Suno kay Conlu, sa ginpatigayon nga swab test, kapin isa ka libo na ang nagnegatibo apang may yara pa subong sang ginahulat nga swab test results.
Ang mga nasambit nga nagpositibo ang separado sa nauna na nga gin-anunsyar nga mga kaso sa City Treasurer’s Office kun sa diin una nga naidentify sang City Epidemiology and Surveillance Unit ang index case.
Nagapadayon man suno kay Conlu ang contact tracing sa naka-close contact sang mga infected sang virus.
Una diri, gin-anunsyar man ni Iloilo City Mayor Jerry Treñas nga ang may negative test results lang anay ang pahanugutan nga makabalik sa trabaho sa Iloilo City Hall. #
