ILOILO – Nakasulat pa si San Dionisio, Iloilo Mayor Larry Villanueva sang pangalan sang iya iloy kag pangalan sang iya barangay antes siya ginbawian sang kabuhi sa ospital sa syudad sang Iloilo kaina sang kaagahon.
Sa interview sang Bombo Radyo sa utod ni Mayor Villanueva nga si Dr. Gerry Gene Villanueva, iya ginpahayag nga nakabatyag sang tuman nga ka sakit sang tiyan ang alkalde sang Domingo sang kaagahon rason nga gindala ini sa Iloilo Mission Hospital.
Antes sang hitabo, natural na nga mahipuson kag wala nagapanugid sang matuod nga ginabatyag si Mayor Villanueva kag masami lang nagahambal nga “okay” lang siya.
Suno pa kay Dr. Gerry Gene, masami man nga nagapulaw si Mayor Villanueva sa iya iloy nga napatay kag natalana na kuntani nga igalubong sa Oktubre 3.
Kaina sang aga, sang naglala na ang kondisyon sang alkalde bangud sang ginasuprer nga liver cancer, nakasulat pa ini kag nagapati ang iya mga utod nga luyag sang alkalde nga dal-on siya pabalik sa ila lugar sa Barangay Bagacay.
Si Mayor Larry Villanueva ang ika duha sa 5 ka mag-ulutod nga anak ni anay Mayor Pio Villanueva.
Sa subong, ginaistoryahan pa sang pamilya kun posible nga madungan nalang sila lubong sang iya iloy.
Nagpasalamat man ang pamilya sa tanan nga nagpalab-ot sang simpatiya kag mensahe sa ila nga pamilya sa tion sang ila kalisod.
