Nagdangat na sa 105 ang narecord nga kaso sang coronavirus disease 2019 (COVID-19) sa mga Persons Deprived of Liberty (PDL) sa bug-os nga Western Visayas.
Sa sini nga numero, 56 ang active cases, 46 ang nakarecover kag 3 ang napatay.
Sa interview sang Bombo Radyo kay Jail Superintendent Gilbert Peremne, deputy regional director for administration sang Bureau of Jail Management ang Penology (BJMP) – Region VI, iya ginpahayag nga ang nagpositibo sa mga PDL ang yara sa isolation facility kag wala gindirekta sulod sa mayorya sang populasyon sa mga presuhan.
Apisar ginsuspinde na ang pagbisita sa mga presuhan umpisa sang Marso, may yara sang ginalantaw nga rason ang talatapan kun ngaa nainfect sang virus ang mga inmates.
Posible suno sa natungdan nga dala ini sang mga PDL nga bag-o lang gin-remit sang law enforcement agencies.
Mahimo man nga nalatnan sang virus ang mga PDL kun sila ang gindala sa ospital, ukon posible man nga nainfect sang ginapatigayon ang court hearings kag sila ang nakatambong.
Magluwas sa mga PDL, 51 man ang nagpositibo sa mga personnel sang Bureau of Jail Management ang Penology Region VI.
27 sa sini nga numero ang active cases kag 24 ang nakarecover.
