ILOILO – Napasaka na sang Tigbauan Municipal Police Station ang kaso-kriminal batok sa suspek nga ginapahayag nga naghimulos sa 35 anyos nga babayi sa Barangay Bagumbayan, Tigbauan, Iloilo.
Sa interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga Rape by Carnal Knowledge and Sexual Assault ang gin-file batok sa 57 anyos nga suspek nga si Alyas Mario.
Sa imbestigasyon sang kapulisan, natabo ang krimen 8:00 sang Domingo sang gab-i, Setyembre 27.
Matandaan nga nagahilibion ang biktima sang nakit-an sang mga barangay tanod nga yara sa kilid dalan sa nasambit nga barangay sang amo nga gab-i.
Base sa panaysayon sang biktima, nag-order ang suspek sang pizza kag sang nadeliver na, gin-alegar sini nga ginguyod siya padulong sa talamnan, ginhimuslan, ginbus-alan sang uhot, ginkuga kag ginsulok-sulok sang suspek.
Samtang, santo naman sa depensa sang suspek, ginbayaran niya ang babayi agud may matabo sa ila apang wala sila nagsugtanay kag indi man matuod suno sa iya nga may natabo sa pagsakitanay kag pagpilitay.
Ang suspek ang yara subong nakahunong sa custodial facility sang Tigbauan Municipal Police Station samtang napaidalom naman ang biktima sa medical examination. #
