Naghingyo ang Iloilo Provincial Government sa mga local government units nga magpasar sang ordinansa agud dumilian ang mga tawo nga magdala sang disposables sa mga public tourism sites sa probinsya.
Sa interview sang Bombo Radyo kay Iloilo First District Board Member Marcelino Valentine Serag, iya ginpahayag nga talalupangdon ang pagdamo sang basura sa mga lugar nga ginabisitahan sang mga tawo bangud kalabanan sa ila ang nagapicnic kag nagadala sang mga plastic kaangay sang water bottles.
Suno kay Serag, duna na sa tawo nga kun ano ang disposable nga dala, ginabilin na lang sa lugar nga gintiniran rason nga indi man makontrol ang basura ilabi na kun indi man pribado ang tourism site.
Bangud sini, ginaduso sang opisyal nga magbalay sang istrikto nga patakaran ang mga banwa agud imandu nga ibilin lang sa entry point sang lugar ang dala nga disposable kag balikan lang ugaling kun magpauli na ang bisita.
Plano man sang nasambit nga board member nga magpasar sang ordinansa para dumilian ang disposable materials nga dal-on sa mga lugar nga lalagawan sang publiko. #
