Indi ka na bala makatulog bangud sang anxiety kag stress dala sang COVID-19 pandemic?
Mahimo isa ka man sa nagapulaw sa paglantaw sang mga videos online agud malingaw mo ang imo kaugalingon.
Kun kaangay sini ang imo aktibidad, pilia ang videos nga may mga cute nga sapat bangud may mga pagtuon nga nagapamatuod nga makapaayo ini sa imo ikaayong lawas.
Suno sa pagtuon sa University of Leeds sa United Kingdom, in partnership sa Western Australia Tourism, ang paglantaw sang mga laragway kag video sang cute nga mga sapat sa sulod sang 30 minutos ang makaapekto sa blood pressure, heart rate kag anxiety sang isa ka tawo.
Sa experiment ni Dr. Andrea Utley, associate professor sa University of Leeds, may mga baby animals siya nga ginpalantaw sa 19 niya ka subject nga ginalakipan sang 15 ka estudyante kag apat ka staff nga lunsay stressed bangud sang ulubrahon sa eskwelahan.
Matapos ang 30 minutos, lunsay man nagnubo ang blood pressure, heart rate kag anxiety sang mga participants.
Nangin ‘within ideal blood pressure’ ang dugo sang mga pumalasakop, samtang nagnubo naman sa 35% ang anxiety nila sang gintakos gamit ang State-Trait Anxiety Inventory, isa ka self-assessment method nga ginagamit sa clinical settings sa pag-diagnose sang anxiety.
Ikaw, ka-Bombo, indi gid magpatama sa imo ginabatyag nga kasubo: gamita man sang husto ang imo tion online agud mabuhinan ang imo nga anxiety.
(Photo: Very Well Mind)
