Kun ikaw isa ka maayo nga tawo kag madamo sang nabuligan, sigurado nga dumdumon ka sang tanan bisan indi ka na nila makit-an.
Ini ang natabo sa isa ka lugar sa Romania kun sa diin landslide win sa gihapon sa iya ikatatlo nga termino ang isa ka alkalde apisar napatay siya duha ka semana antes ginpatigayon ang eleksyon.
Ang ginatumod nga alkalde amo ang 57 anyos nga si Mayor Ion Aliman sang Deveselu, isa ka village sa southern Romania, nga napatay sang Setyembre 15 dala sang kumplikasyon sa coronavirus disease 2019 (COVID-19).
Sang ginpatigayon ang eleksyon, nanindugan ang mga tawo nga deserving gihapon sa pwesto si Aliman kag dapat magpabilin bilang alkalde sang ila nga lugar.
Sa video nga ginshare sang mga residente sa social media, makit-an nga nagdugok ang mga tawo sa pantyon ni Aliman agud magsindi sang kandila matapos nga nakuha niya ang 64% percent sang boto sang bug-os nga populasyon.
Nagpaathag naman ang election bureau nga naka-imprinta na sa balota ang pangalan sang nasambit nga alkalde kag indi na makakas.
Bangud sini, patigayunon na naman ang bag-o nga eleksyon. #
