ILOILO CITY – Ginahulat pa sang Iloilo City Government ang approval sang National Inter-Agency Task Force sa ginaduso ni Iloilo City Mayor Jerry Treñas nga mga protocol sa pag-abot sang returning overseas Filipinos (ROFs) sa siyudad.
Ini ang may kaangtanan sa Executive Order 155 nga ginpapanaug ni Iloilo City Mayor Jerry Treñas kun sa diin nakasaad nga umpisa Oktubre 1, required ang negative result sang reverse transciption polymerase chain reaction (RT PCR) test sa mga ROFs ‘within 72 hours’ antes ang petsa sang ila nga pagbyahe pabalik sa siyudad.
Kinahanglan man ang Notice of Coordination and Acceptance paagi sa Iloilo City Emergency Operations Center.
Sa interview sang Bombo Radyo kay Iloilo City Mayor Jerry Treñas, iya ginpahayag nga kun may amo sini nga dokumento ang ROFs, indi na kinahanglan ang mandatory quarantine.
“Kun may negative RT-PCR result sila,pagusto na sila kun ano obrahon nila. Wala na quarantine, imonitor nalang sang Barangay Health Emergency Response Team sa ila nga balay,” pahayag sang alkalde.
Napasa na ang EO sa IATF kag gina-follow up na lang ang approval.
