ILOILO CITY – Mangita pa ang Iloilo City Government sang pasilidad kun sa diin mahimo matingob ang mga coronavirus disease 2019 (COVID-19) positive nga nagabusong nga mga babayi agud malikawan ang huol kun sila ang manugbata na.
Sa interview sang Bombo Radyo kay Iloilo City Mayor Jerry Treñas, iya ginpahayag nga base sa nakasugtan sang Department of Health (DOH) Region VI kag sang syudad sang nagligad, sa Western Visayas Sanitarium kuntani dal-on ang infected nga nagabusong nga mga babayi apang sa subong, masami na nga nagabalibad ang sanitarium sa rason nga ‘puno na’ ang ila talatapan.
“Amo na ang amon agreement sang una but I do not know what happened to that, so we have to look for another facility,” pahayag sang alkalde.
Matandaan nga sini lang nga semana, nangin kontrobersyal ang reklamo sang isa ka pamilya kun sa diin ginpahayag nga wala gin-atipan sang mga medical staff sang St. Therese MTCC Hospital ang ila himata bangud COVID-19 positive ini.
“St. Therese is not a hospital. It is an isolation facility,” depensa ni Mayor Treñas. “Nahuya man ko gani sa tag-iya kay te ginpahulam lang na sa aton nga wala kita bayad pero nadalahig pa kag nadala ang ila nga ngalan sa sini nga isyu.”
Subong nga adlaw, Oktubre 2, natalana man nga magsapol ang COVID-19 team sang syudad kag istoryahan suno sa alkalde ang mga protocol agud indi na masulit ang kaangay nga hitabo.
Sa pihak sini, nagpasalig man ang opisyal nga may imbestigasyon nga himuon: “If there is really a negligence from the part of the doctor, then they will have to answer to that.” Ini ang may kaangtanan sa pahayag sang pamilya nga ginhambalan sang doktor ang ila himata nga, “kadaku sang tattoo mo, mahibi-hibi ka da. Indi gid pagpagguwa-a ang bata kay COVID-positive ka.”
Suno pa sa alkalde: “What we need to have is a protocol kun diin imanage ang pregnant women nga taga-syudad kay wala sila nahatagan sang maayo nga serbisyo. We will come up with a better protocol.”
