ILOILO CITY – Ginmando sang Iloilo City Government ang pagpatuman sang minimum health protocol sa sulod sang balay.
Suno kay Mr. Jeck Conlu, tagpamaba sang COVID-19 Team sang Iloilo City Government, ang paglaton sang virus ang pinamilya na.
“Gusto ko lang ipahibalo sa aton pumuluyo nga ang aton cases subong, pinamilya na. So buot silingon, kun ang isa ka pamilya, may nagpositive sa ila after sa pag-swab sa ila, ubos gid noh. Kag ano na ni ang nakita naton nga trend. So buot silingon nga bisan dapat sa aton panimalay, kinahanglan mag practice gid kita sang minimum health protocol. Indi lang ni siya sa gwa sang balay. Nakita na naton nga ang result nga nagaabot sa aton ang gulpi lang naga shoot up ang cases sa mga barangay.”
Ginpahayag ni Conlu nga kun ang isa ka COVID-19 patient ang magpabilin sa ila balay kag magpa-swab man ang iya myembro sang pamilya, dako ang posibilidad nga magpositibo man ang mga ini sa virus.
Ginhalimbawa man ni Conlu ang natabo sa isa ka barangay sa diin pito gid ka myembro sang pamilya ang nagpositibo sa COVID-19.
Gin-ako man ni Conlu nga may ara sang mga makadlaw nga apisar sa sulod sang balay nagakadapat nga ipatuman ang physical distancing kag magsuksok sang face mask.
Apang suno sa natungdan, kinahanglan ini nga ipatuman agud indi madali nga malatnan ang mga bilog nga pamilya kunmay himata sila nga magpositibo sa COVID-19.
Panugyan ni Conlu, nagakadapat nga indi kita magkampante apisar yara sa sulod sang balay.
