Ginsuspinde sa senado ang isa ka Brazilian Senator matapos nadakpan sang mga pulis nga nagatago sang kwarta sa iya underwear.
Ang raid sa northern state sang Roraima ang ginpatigayon bilang kabahin sang imbestigasyon batok sa ginaalegar korapsyon sa pondo nga ginagamit sang Brazil sa ila coronavirus disease 2019 (COVID-19) response.
Ang senador amo si Chico Rodrigues, deputy leader sa Senado para sa agenda sang administrasyon ni President Jair Bolsonaro.
Ginapahayag nga natigayon nga makuha sa possession sang senador ang 30,000 reales (US$5,300) nga cash lakip na ang kwarta nga yara sa iya alatrasan ukon buttcheeks.
90 ka adlaw ang suspensyon nga ginmandu ni Supreme Court Justice Luís Roberto Barroso batok sa senador apang ginatun-an pa kun posible nga mangin permanente na ini nga silot.
Ginpahayag pa sang Korte Suprema nga may yara sang video ang kapulisan nga makamapatuod sang natabo sang ginpatigayon ang search, apang nagpamalibad na si Barroso nga i-release ang mga laragway agud malikawan ang tuman nga kahuy-anan ilabi na bangud sa alatrasan sang senador nakuha ang kwarta.
“The police team possesses a video of the second personal search that was carried out. However, in this case, considering the manner in which the money was hidden by Senator Chico Rodrigues – quite deeply in his underwear – I will not reproduce these images in this report so as not to cause greater embarrassment,” pahayag ni Barroso.
Sa pihak nga bahin, ginkumpirma man sang senador nga gin-raid ang iya nga balay, apang nagpamalibad na siya sa paghatag sang dugang nga detalye. Nagapanindugan ang natungdan nga wala siya sang malain nga ginhimo kag matinlo ang iya mga akto sa sulod sang 30 ka tuig sa pulitika.
Pahayag naman ni Presidente Bolsonaro, ang raid nga ginpatigayon ang nagapamatuod nga ginapamatukan sang iya administrasyon ang korapsyon.
“There is no corruption in my government and we fight corruption, whoever it is,” pahayag sang presidente.
Nahibaluan nga subong, under investigation man ang anak sang nasambit nga presidente bangud sang ginaalegar graft sa Rio de Janeiro.
