Pabor si Iloilo City Mayor Jerry Treñas sa desisyon sang Inter-Agency Task Force nga pahanugutan na ang operasyon sang licensed cockpits kag cockfighting activities sa mga lugar nga yara sa Modified General Community Quarantine (MGCQ) ukon may mas manubo pa nga quarantine classification.
“I will allow it pero ang problema lang ara pa kita sa GCQ subong,” pahayag sang alkalde nga nagatumod sa syudad nga napaidalom pa sa general community quarantine (GCQ).
Sa interview sang Bombo Radyo kay Treñas, iya ginpahayag nga igahanda na ang mga protocol sa syudad agud mapatuman ang kaangay nga mga aktibidad kun mapaidalom na sa MGCQ ang syudad.
“Wala man ko ya nagabulang, pero nahangpan ko nga kadamo man sang nagasalig dira nga palangabuhian nila kag kadamo sang nagasagod sang manok,” dugang pa ni Treñas.
Suno kay Mayor Treñas, positibo siya nga mapanubo ang quarantine classification sang syudad sang Iloilo sa katapusan nga bahin sang Oktubre.
