Wala sang malain nga rekord sa barangay ang mangunguma nga ginluthang-patay sang ginapahayag armado nga grupo sa Brgy. Supa, Tigbauan, Iloilo.
Sa interview sang Bombo Radyo kay Punong Barangay Danilo Tahinay, iya ginpahayag nga may yara sang ginatiniran nga balay kag ginatatap nga uma sa ila barangay ang biktima nga si George Jutay alyas Joe apang residente gid ini sang Brgy. Nanga, Guimbal, Iloilo.
Suno kay Tahinay, nakaagi man nga ginpatawag ang biktima sa ila nga barangay apang “magamay lang kag pinamilya nga problema”. Magluwas diri, wala na sang gintuga nga gamo sa Barangay Supa si Jutay.
Suno kay Tahinay, matuod nga alagyan sang rebelde nga grupo ang ila barangay kag sang una tuman gid ka gamo bangud sang kalakasan sang mga ini.
Suno kay Tahinay, siya mismo ang nakaagi man nga naluthangan kag nangin kritikal ang kondisyon sang una matapos nabiktima sang nasambit nga grupo.
Nagpamalibad na ang punong barangay sa pagkomentar kun may yara pa sang residente sa ila nga lugar nga katapo sang mga rebelde. Sa subong, nagapanawagan ang punong barangay sa mga “grupo sa gwa” nga untatan na ang kaangay nga mga aktibidad agud maglinong na ang ila nga lugar.
