2 ka pamilya, gin-rescue sang Zarraga MPS, responders matapos na-trap sa sulod sang balay bangud sang tuman ka baskog nga daludo sang tubig

ILOILO – Duha ka pamilya ang natigayon nga ma-rescue sang Zarraga Municipal Police Station kag Municipal Disasters Risk Reduction and Management Office kasunod sang nagtaas nga tubig-baha sa Barangay Libongcogon, Zarraga, Iloilo kagab-i, Oktubre 27.

Sa interview sang Bombo Radyo kay Pol. Lt. Johnny Arnad, hepe sang Zarraga Municipal Police Station, iya ginpahayag nga walo tanan ka indibidwal ang gin-evacuate — apat ka adults, tatlo ka kabataan, kag isa ka infant.

Tuman ka baskog ang daludo sang tubig suno kay Arnad rason nga ginhingagaw gid pahalin sa ila balay ang amo nga mga pamilya kag gindala sa balay sang isa ka SB member.

Sa subong, nagsubside na ang tubig-baha suno sa natungdan.

Padayon pa ang water level monitoring sa amo nga banwa.