ILOILO – Pasakaan sang kaso nga murder kag frustrated murder ang magpamilya nga ginapahayag nagsulod sa isa ka balay sa Zone 2, Barangay Poblacion, Estancia, Iloilo kag nagwasay kag nagbuno sa duha ka mga biktima.
Patay ang isa ka biktima nga si Jeffrey Corvera, 46 anyos, matapos nakaangkon sang patal nga pilas sa tangkugo, likod, ulo kag dughan.
Padayon naman nga ginabulong sa ospital ang isa pa ka biktima nga si Ryan Villaluna, 31 anyos, matapos nakaangkon sang pilas sa likod, dughan, kag ulo.
Sa interview sang Bombo Radyo kay Police Major Aldren Lamera, hepe sang Estancia Municipal Police Station, iya ginpahayag nga nagapauli ang duha ka biktima kagab-i, Oktubre 27, sang gilambatan sang mga suspek nga sanday Nelson Torrico, 64 anyos nga amay, Jocelyn Torrico, 60 anyos nga iloy, kag mga kabataan nga sanday Nel John, 30, Nelson Jr., 29, kag Niel, 25.
Suno kay Lamera, may pagpinuisay pa nga natabo rason nga naimpito ang mga suspek kag nahimo ang krimen.
Una pa nga nagtuyo magpalagyo si Villaluna apang sang nagbalik agud i-check ang sitwasyon sang iya kaupod, ginsugata siya liwat sang mga suspek.
Suno kay Lamera, may mga tawo pa sa sulod sang balay nga lunsay man himata ni Corvera apang sirado ang pwertahan rason nga wala sila nadalahig sa pagpangwasay kag pagpangbuno.
Ginapahayag nga ang amay kag ang anak nga si Nelson Jr. ang nagpangamot sa krimen kag nakit-an pa suno kay Lamera nga nagasugo ang iloy nga himuon ang krimen.
Ginapahayag man nga nag-ugat ang kaakig sang mga suspek sa masami pagpasibangod sang mga biktima nga nagapangawat sila sa ila nga barangay.
Sa subong, lunsay nakahunong sa presuhan ang mga suspek.
