Liwat nga nagpahanumdom ang Mines and Geosciences Bureau-Department of Environment and Natural Resources Region 6 sa mga kabanwahanan sa probinsya sang Iloilo nga mag-aligmat bangud sa posible pagluntad sang flash floods kag landslides tuga sang masami pagbubo sang mamunog nga ulan.
Sa interview sang Bombo Radyo kay Engr. Mae Magarzo, chief geologist sang nasambit nga talatapan, iya ginpahayag nga nahimuan na kag nahatagan sang geo-hazard maps ang mga local government units sa probinsya.
Lakip sa ginakabig nga high-risk areas sa probinsya sang Iloilo bangud sang pinakadamo nga narekord nga landslides amo ang Leon, Calinog, Lambunao, Maasin, Igbaras, Tubungan, kag Alimodian.
Suno kay Magarzo, masami gid ginapahangop sa mga LGU officials nga i-relocate ang mga balay nga nahamtang malapit sa mga areas nga may mataas nga risgo sang pagbaha kag pag-usmod sang duta.
Mas maayo gid suno sa natungdan nga pamatian ang forecast sang Philippine Atmospheric, Geophysical and Astronomical Services Administration (PAGASA).
Ginapanugyan man nga likawan ang pagtukod sang balay sa floodplains ukon mga area malapit sa suba bangud posible matiphag ang duta sa dalayon nga pag-ulan.
Bangud sa masami nga pag-ulan subong nga onset sang La Niña, ginpahayag sang opisyal nga nagahuyang man ang duta gani dapat nga hatagan sang pagtamod ang temprano nga pagpa-evacuate sa mga tawo kun malain ang tiempo.
