ILOILO CITY – Plano sang mga opisyal sang Barangay Yulo Arroyo, Iloilo City Proper nga ipalab-ot sa Iloilo City Government kag magpangayo sang bulig sa kapulisan bangud sang lalaki nga nakit-an sa Muelle Loney St. nga nagabalik-balik kag nagasimhot sang rugby.
Ang amo nga lalaki ang kilala nga si Alyas Apog, ginabanta 24 anyos, kag ginapahayag nga nagapauli sa Baranggay Calaparan, Arevalo.
Sa interview sang Bombo Radyo kay Baranggay Kagawad Joy Locsin, iya ginpahayag nga tatlo na ka adlaw nga nagatinir sa idalom sang water pump station ang amo nga lalaki kag may dala nga botelya sang rugby.
Ginatinguhaan man suno kay Locsin nga maabtan kag maistorya si Alyas Apog apang ginaalegar nga naglain na ang paminsaron rason nga nagadalagan kag nagabalik man kun wala na sang tawo sa water pump station.
Nagaapelar man ang opisyal nga indi na pagbaligyaan sang rugby ang amo nga lalaki.
Ginakulbaan man ang mga residente suno sa opisyal bangud masakit kun manulok-tulok si Alyas Apog.
