ILOILO CITY – Nakasabat na ang Department of Health (DOH) Central Office sa sulat ni Iloilo City Mayor Jerry Treñas may kaangtanan sa pagsalangisag sang reporting sang COVID-19 cases sa syudad.
Matandaan nga ang concern sang alkalde ang nag-ugat sa conflicting data nga ginarelease sang ahensya kun sa diin wala ini nagasanto sa numero nga ginareport sang City Health Office-City Epidemiology and Surveillance Unit (CHO-CESU).
Sa interview sang Bombo Radyo kay Treñas, iya ginpahayag nga nagpromisa na ang ahensya nga pungkuan na sang maayo ang data reporting kag adlaw-adlaw nga i-check agud indi na makatuga sang panic kag kahadlok sang mga tawo kun makit-an nga mataas ang numero sang kaso nga ginareport.
Liwat nga ginpahayag sang alkalde nga real-time ang pagreport sang City Health Office.
Sa interview naman sang Bombo Radyo kay Dr. Marie Jocelyn Te, COVID-19 spokesperson sang Department of Health Region VI, iya ginapahayag nga diretso nga nagakuha sang COVID-19 cases report ang Central Office sang mga COVID-19 laboratories.
Buot silingon, wala na nagaagi sa talatapan sang regional office ang ginakuha nga data sang central office.
Ginaverify pa sang central office suno sa health official kun sa diin nga LGU nalakip ang bag-o nga COVID-19 case rason nga may delay pa kun kaisa.
Suno pa kay Dr. Te, may mga tion nga indi makasumite ang laboratories sa LGUs rason nga lain ang ginareport nga numero.
