May pinasahi nga mga pamaagi ang mga opisyal sa Barangay Parara Sur sa Tigbauan, Iloilo agud mapabilin nga matinlo ang ila lugar kag maka-tipon sang kwarta subong nga may COVID-19 pandemic.
Sa interview sang Bombo Radyo kay Punong Barangay Vicente Torrento, iya ginpahayag nga kilala ang ila lugar bilang Home of Recycled Materials.
Ini ang sulit-sulit nga napamatud-an paagi sa inisyatibo sang ila mga barangay kagawad nga naghimo sang mga penholders nga human sa bato, bags nga human sa mga retaso nga tela, kag mga aritos kag bracelets nga human sa papel.
Suno kay Torrento, maswerte siya bangud lunsay nagatrabaho ang iya mga barangay officials kag naga-advocate para sa recycled materials nga nakabulig gid sang daku sa ila nga palibot.
Suno naman kay Mildred Dela Cruz, barangay service point officer kag amo mismo ang utok sa likod sang mga local products sa ila nga barangay, iya ginpahayag nga 2008 pa sang nag-umpisa siya sa iya nga passion sa paghimo sang art products.
Nalipay si Dela Cruz nga nagakalingaw siya sa iya trabaho kag nakaupod man sa showcase sang local products sa idalom sang local government unit sang Tigbauan.
Wala man ginadalok ni Dela Cruz ang iya nga talent bangud may yara man sang gin-updan niya train nga mga babayi sa ila barangay nga nagabulig man sa paghimo sang nasambit nga mga produkto.
Sa subong, nagasako ang mga opisyal sa paghimo sang ila giant Christmas Tree nga humanon gamit ang mga styrofoam kag iban pa nga mga recyclable materials.
