ILOILO – Wala sang anuman nga kasablagan nga makaupang sa isa ka tawo nga desidido kag may positibo nga panan-awan sa kabuhi.
Ini ang ginpamatud-an sang istorya ni Felizardo Consular, 28, tumandok sang Janiuay, Iloilo apang nakapangasawa kag subong nagatinir sa Barangay Buyuan, Tigbauan, Iloilo.
Si Felizardo, Zardo para sa iya mga abyan, ang halos 10 na ka tuig nga nagapangabuhi nga utod ang iya tuo nga tiil.
Natabo ang insidente sang siya ang 18 anyos, samtang naga-hampang sang basketball sa Manila. “Abi ko ugat lang nga naipit, pero sang ulihi sang gin-X ray, nabal-an nga may fracture akon nga tuhod kag nahulog sa bone tumor. Te no choice gid. Nagdesisyon ako nga ipautod kay kun indi pag-utdon, masaka sa akon lawas ang cancer cells,” pahayag ni Zardo.
Bangud sa natabo, nag-untat si Zardo sa iya trabaho sa poultry sa Manila, kag nagbalik sa Iloilo agud ipautod ang iya tuo nga tiil.
“Nagsulod sa isip ko nga wala na ko pulos. Indi ko na sarang maobra ang mga bagay nga gusto ko obrahon,” pahayag niya.
Suno sa iya, sang amo nga tion, nagsulod pa sa iya nga isip nga tapuson ang iya nga kabuhi… butang nga iya ginpasalamatan nga wala niya gindayon.
“PADAYON LANG”
Maswerte si Zardo nga may yara siya sang mga abyan nga wala nagabiya sa iya apisar sang iya nga sitwasyon.
Matapos ang isa ka bulan nga pagpabukot sa balay, nagdesisyon si Zardo nga mangita sang trabaho.
Sa sulod sang isa ka tuig, nangin pahinante siya sang isa ka truck nga nagabyahe padulong sa Bacolod, Dumaguete, Negros Occidental, kag Cebu.
“Gapasalamat gid ko sa akon nga mga amigo nga wala nila ko ginbayaan. Adlaw-adlaw gakadto ko sa akon nga mga migo kag naisip ko nga wala ko kasablagan. Nag-enjoy gid ko sa akon nga obra kay makalagaw-lagaw kami. Damo ko migo kay maayo man ko nga tawo.
“May mga tion nga gina-bully siya suno kay Zardo apang, suno sa iya: “Siling nila, ‘Kumpol kumpol! Siling ko sa ila, ‘te gwapo man!'”
“KUN KAMO GID ABI ANG PARA SA ISA KAG ISA, KAMO GID NA”
Kun may yara pa gid sang isa ka butang nga tuman nga nagapahalipay sa 28 anyos nga si Zardo, ini amo ang iya pamilya — ang iya matahum nga asawa nga si KC kag ila 10 nga bulan nga anak.
“Galangoy langoy lang ko di sa baybay, tapos galakat-lakat siya di sa binit sang baybay, na-love at first sight ako sa iya,” kabahin sang pagbalik-balik ni Zardo sang una nga tion nga nakita niya ang iya napangasawa nga si KC.
Kun maswerte si Zardo, mas maswerte naman si KC nga nakakita siya sang pagpalangga nga suno sa iya, “sobra sobra.”
“Amo na hambal nga kun nakasal na kamo, in sickness and in health, through richer and poorer, kun kamo na, kamo gid na gihapon,” pahayag ni KC.
“Una ko nga kita sa iya, na-love at first sight man ko. Promise! Amo na siling nila nga kun destined kamo sa isa kag isa, kamo gid ina.”
Ang mapagsik nga 10 ka bulan nga bata nga lalaki amo ang bunga sang paghigugmaanay nanday Zardo kag KC.
“Ang pagpalangga ya, sobra sobra. Kun ano ang pagpalangga ko sa iya, amo man na pagpalangga ya sa akon,” pahayag ni KC. “
Very caring siya sa bata ya kag syempre ginahimo ya gid tanan bilang amay. Wala ko siya ginatulok nga may kulang sa iya, ginatulok ko sya bilang kompleto nga tawo.”
Sa subong nga tion sang pandemya kag limitado ang hulag sang tanan, malipayon si Zardo nga bisan utod man ang iya nga tiil, kumpleto ang pundasyon kag natukod sang maayo ang iya pamilya nga amo ang iya inspirasyon sa padayon nga pagpangabuhi. #
