ILOILO CITY – Nagatinguha ang mga otoridad nga ma-involve gid sa mga mapuslanon nga ulubrahon sa komunidad ang mga reported gangs sa mga distrito sa syudad sang Iloilo.
Sa distrito sang La Paz kag Lapuz, pito ka mga grupo ang narekord sang La Paz Police Station kun sa diin ginapahayag nga mga pamatan-on ang mga miyembro.
Ini nga mga grupo ang ginalakipan sang:
– LBS ukon Little Brown Style
– TBS ukon True Brown Style
– MBS ukon Mga Batang Sikat
– Homeboys
– Guardians
– Gori Gang
– OR ukon Oliys Republic
Sa interview sang Bombo Radyo kay Police Major Edfel Balibadlan, hepe sang La Paz Police Station, iya ginpahayag nga ginapatawag sang Women and Children Protection Desk ang gang leader sang kada grupo.
Gina-tap naman ang mga barangay agud sila na ang magmato-mato sa pagtatap sang iban pa nga mga miyembro sang grupo agud malikawan ang mga kinagamo.
Aktibo suno kay Balibadlan ang “Project Pandilla” ukon mas kilala nga “Project B.O.N.G” nga una nga ginlunsar sang 2016 agud nga matutukan ang peace and order situation sa ila distrito.
Matandaan nga liwat nga nangin sentro sang mga balita sa syudad ang youth-gang related incidents sang nagligad nga semana matapos ang sundanay nga rambol sa Iloilo City Proper.
