Gin-athag ni Iloilo City Mayor Jerry Treñas nga wala niya ginpatawag sanday anay Iloilo Councilors Plaridel Nava kag Joshua Alim agud mag-upod sa iya sa politika sa 2022 election.
Sa exclusive interview sang Bombo Radyo kay Treñas, iya ginpahayag nga mismo si Alim ang nagtawag sa iya kag naghingyo nga makigkita sila ni Nava sa iya.
Suno sa Treñas, nakigkita man siya kanday Alim kag Nava kaupod ang iya chief of staff nga si Jonas Antonio Bellosillo.
Ginpahayag sang alkalde nga nagpabutyag sanday Alim kag Nava nga luyag nila mag-upod sa iya sa masunod nga eleksyon.
Apang ini ang ikonsulta pa sang alkalde sa iya grupo.
Nagsabat naman si Treñas tuhoy sa ginapahayag kondisyon ni Nava nga indi siya mag-upod sa grupo ni Treñas kun ara si Iloilo City Lone District Rep. Jamjam Baronda.
Diri kag ginpahanumdom sang alkalde nga sila si Nava kag Alim ang naghingyo nga mag-upod sila liwat sa politika kag indi siya ukon sin-o man nga myembro sang ila partido.
Dugang pa sang alkalde, tuman pa ka temprano agud istoryahan ang politika sa diin mayor niya nga ginatutukan sa subong amo ang pagtapna sang COVID-19.
