ILOILO CITY – Ginapangitaan sang paagi sang Iloilo City Government nga mahatagan sang proteksyon ang commercial sex workers sang syudad nga exposed sa COVID-19 bangud sang ila trabaho.
Sa interview sang Bombo Radyo kay Nestor Canong, pinuno sang Task Force on Morals and Values Formation, iya ginpahayag nga bangud sa pagsirado sang night clubs kag KTV bars, freelancers na subong ang mga sex workers kag nagalagaw kun kagab-ihon.
Sa plaza nagatinir ang mga kababayihan suno kay Canong kag namensyonar ang mga dalanon sa Ledesma, Arroyo, Mabolo-Delgado, Valeria, kag Mabini.
Sang damlag lang suno kay Canong, anum ka sex workers ang narescue sang task force kag gindangop sa police stations matapos nadakpan nga nagahimo sang ila ‘trabaho’ sa KTV bars.
Ang seguridad lamang sang sini nga mga babayi suno kay Canong amo ang paggamit sang condom apang indi naman masunod ang iban pa nga mga protocol batok sa COVID-19.
Apisar wala nagauntat ang Iloilo City Government sa kampanya agud mauntat na ini nga mga aktibidad sang mga sex workers, madamo man ang nagarason suno kay Canong nga wala na sila sang iban pa nga palangabuhian kag wala sang isagod sa ila nga pamilya.
