ILOILO CITY – Pabor si Iloilo City Mayor Jerry Treñas nga dugangan ang seating capacity sa mga depampasero nga jeep sa syudad sang Iloilo.
Sa inteview sang Bombo Radyo kay Treñas, iya ginpahayag nga personal siya nga naga-ugyon sa sentimento sang mga jeepney drivers kag sang transport groups nga dapat dugangan ang ginapahanugutan nga makasakay nga mga pasahero agud makabawi man sang income ang drivers.
Magluwas diri, kinahanglan man ini suno sa alkalde sang mga pasahero nga nagakagab-ihan sa dalan bangud sa ila trabaho.
Apang kadungan sini, gin-athag sang alkalde nga indi sa iya magahalin ang desisyon bangud kinahanglan pa ang approval sang National Inter-Agency Task Force.
“Pabor ako sina but we will have to seek guidance from the IATF kay indi man kita basta-basta makadesisyon para dira. I would like to state publicly that I am in favor kay ang aton nga jeepney drivers, nabudlayan na sila subong kay ang ila capacity gin-reduce. It is only when they will be able to cater about 60 to 70 percent nga makabawi bawi man sila. I will try to lobby for that.”
Nahibaluan nga tubtob gid lamang sa 50% ang passenger load nga ginapahanugutan sa mga public utility jeepeneys (PUJs) sa syudad nga subong yara sa general community quarantine (GCQ) status.
Sa letter of request nga ginpadala sang Iloilo City Loop Alliance of Jeepney Operators and Drivers Association kay Treñas, ginahingyo nga pataasan sa 60-70% ang seating capacity.
Kun magbag-o na ang quarantine classification sang syudad para sa Disyembre, ginalauman nga madala ini nga sektor sa mapahalugan nga restriction.
