Limitado lang sa magpamilya sa sulod sang balay ang pagpatigayon sang Christmas kag New Year celebrations subong nga holiday season.
Ini ang kabahin sang Executive Order 183-G nga ginpirmahan ni Iloilo Governor Arthur Defensor Jr. kahapon, Disyembre 3.
Yari pa ang pila ka mga importante nga mga punto sa nasambit nga executive order:
Ginadumilian ang community fireworks display kag ang Christmas lights festivals.
Indi man pwede ang house-to-house carollings.
Ginadumilian ang pagtilipon kaaagay sang Christmas parties, receptions kag anuman nga mga selebrasyon sa mga social halls, function rooms, cottages kag iban pa nga pasilidad sa hotels kag mga establisemento.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ang iya nga executive order ang isa ka apelar sa mga taga-probinsya nga ipaiway anay kun ano man ang mga normal nga naandan sa nagligad nga paskwa.
Ginalikawan lang suno sa gobernador ang pagtimbuok sang kaso sang COVID-19 nga mahimo matabo kun pahanugutan ang public gatherings.
Yara man sa nasambit nga executive order ang pagmandu sa mga tag-iya sang mga food establishments sa probinsya nga magbutang sang mga barriers sa ila lamesa agud malikawan ang paglaton sang COVID-19.
Limitado naman sa lima ka adlaw ang haya sa mga patay MAGLUWAS LANG kun may yara sang pending requirements nga indi pa matapos sa sulod sang 5-day time period apang kinahanglan ang pagpahanugot sang alkalde.
Nahibaluan nga ang probinsya sang Iloilo ang yara sa modified general community quarantine (MGCQ) tubtob sa Disyembre 31.
